बीड जिल्ह्यातील मस्साजोग गावाचे सरपंच संतोष देशमुख हत्याप्रकरणात खासदार बजरंग सोनावणे यांनी एक अत्यंत सनसनाटी दावा केला आहे. संतोष देशमुख हत्याप्रकरणातील एक आरोपी हा राज्याचे उपमुख्यमंत्री अजित पवार हे मस्साजोग गावात आले होते तेव्हा त्यांच्या गाड्यांच्या ताफ्यातील एका गाडीत होता. आता या वक्तव्याने संतोष देशमुख हत्याप्रकरणातील धागेदोरे हे धनंजय मुंडे यांच्या पाठोपाठ अजित पवार यांच्यापर्यंत पोहोचण्याची शक्यता निर्माण झाली आहे. बजरंग सोनावणे यांनी गुरुवारी प्रसारमाध्यमांशी बोलताना यासंदर्भात भाष्य केले.
पुढे ते बोलले, यापूर्वी 28 मे रोजी जो गुन्हा दाखल करण्यात आला तेव्हाच जर कारवाई झाली असती तर हे सगळं घडलं नसतं. पोलिसांनी वेळीच गुन्हा दाखल केला असता तर हे झाले नसते. आमच्या खंडणी गोळा करण्याच्या कामात जर अडथळा निर्माण केला तर काय होतं हे दाखवण्यासाठी संतोष देशमुख यांना अशा पद्धतीने मारण्यात आले. ज्या दिवशी हत्या झाली तेव्हा हा आरोपी परळीत होता. हत्या झाल्यानंतर आरोपी आणि पोलिसांची भेट झाली. त्यानंतर हा आरोपी एका नेत्याच्या फार्म हाऊसवर भेटला. यानंतर संबंधित आरोप महायुती सरकारच्या नागपूरमधील मंत्रिमंडळ विस्तार सोहळ्याला हजर होता. तेव्हाच त्याला अटक का करण्यात आली नाही, असा सवाल बजरंग सोनावणे यांनी उपस्थित केला.
अजित पवार जेव्हा मस्साजोगला आले तेव्हा त्यांच्या ताफ्यात जी गाडी होती, त्याच गाडीतून हा आरोपी पोलिस स्टेशनला पोहोचला. पुण्यात आरोपी ज्या घरात थांबला त्याचा तपास व्हायला पाहिजे, अशी मागणीही बजरंग सोनावणे यांनी केली. या सर्वाची चौकशी झाली पाहिजे. जे शरण आले आहेत त्यांचा सीआयडीने तपास करावा. तीन गुन्ह्यांचा तपास एकत्र केल्याने निश्चितच काहीतरी आहे. तपासातून ‘दूध का दूध, पानी का पानी’ होईल. संतोष देशमुख आणि त्यांच्या कुटुंबीयांना न्याय मिळवून देणे, ही आमची जबाबदारी आहे, असेही बजरंग सोनावणे यांनी म्हटले.
पुढे ते बोलले, वाल्मिक कराड यांच्याविरोधात मी एकटा बोलत नाही, सुरेश धस, अभिमन्यू पवार, असे सगळेजण बोलतात, सर्वपक्षीय नेते बोलतात. या सगळ्यांचे कॉल रेकॉर्ड तपासा. माझी एकच अपेक्षा आहे की, शरण आलेल्या आरोपीने व्हिडीओ ट्विट केला. तिन्ही गुन्हे क्लब केले, याचा अर्थ या सगळ्याचा संबंध असला पाहिजे. वाल्मिक कराड एवढे दिवस पुण्यात होते, तर सापडले का नाहीत, असा सवाल सोनावणे यांनी उपस्थित केला. याप्रकरणातील मास्टरमाईंड शोधून काढा असेही ते प्रसारमाध्यमांशी संवाद साधताना बोलले.
हे ही वाचा:
लाचखोर वनक्षेत्रपालाच्या घराची झडती; 57 तोळं सोनं अन् 1 कोटी 31 लाखांची कॅश
“आता खरी मजा आहे”, Manoj Jarange Patil यांची Devendra Fadnavis यांच्यावर टीका
