सोलापूरचे माजी महापौर महेश विष्णुपंत कोठे यांनी वयाच्या ६० व्या वर्षी घेतला अखेरचा श्वास. प्रयागराज येथे सुरू असलेल्या महाकुंभमेळ्यात गेलेले असताना कडाक्याच्या थंडीत गंगास्नान करताना हृदयविकाराचा झटका येऊन त्यांचा मृत्यू झाला. आज सकाळी ही घटना घडली. राष्ट्रवादी काँग्रेस शरदचंद्र पवार पक्षाचे स्थानिक नेते असलेले महेश कोठे हे महाकुंभमेळ्यासाठी आपल्या काही मित्रांसोबत प्रयागराजला गेले होते. सकाळी कडाक्याच्या थंडीत गंगा नदीमध्ये स्नान करत असताना त्यांना अचानक हृदयविकाराचा झटका आला. तात्काळ त्यांना रुग्णालयात हलवण्यात आले.परंतु, उपचारापूर्वीच त्यांचा मृत्यू झाले असल्याचे सांगण्यात आले. त्यांच्या पश्चात घरी पत्नी, एक पुत्र आणि दोन कन्या, सून, जावई असा परिवार आहे. तर, भाजपचे आमदार देवेंद्र कोठे हे त्यांचे पुतणे आहेत.
विष्णुपंत कोठे यांचे महेश कोठे हे चिरंजीव होते. काँग्रेसचे ज्येष्ठ नेते सुशीलकुमार शिंदे यांचे विश्वासू सहकारी सहकारी म्हणून महेश कोठे यांचे वडील विष्णुपंत कोठे यांच्याकडे पहिले जात होते. १९९२ सालापासून २०२२ साली महापालिका बरखास्त होईपर्यंत ते अखंडपणे सोलापूर महापालिकेत नगरसेवक होते. सुमारे २५ वर्षे महापालिकेचा संपूर्ण कारभार कोठे कुटुंबीयाच्या हाती होता. महापौर, पालिका सभागृहनेता अशा जबाबदाऱ्या त्यांनी चोखपाने पार पडल्या आहेत. परंतु अलीकडे सुशीलकुमार शिंदे यांच्याशी बिनसल्यानंतर कोठे कुटुंबीयांनी आपली वेगळी राजकीय वाट धरली होती.
दरम्यान, महेश कोठे यांनी २०१४ साली सोलापूर शहर मध्य विधानसभा निवडणुकीत शिवसेनेकडून थेट सुशीलकुमार शिंदे यांची कन्या प्रणिती शिंदे यांच्या विरोधात लढत दिली होती. नंतर त्यांनी सोलापूर शहर उत्तर विधानसभा निवडणुकीतही भाजपचे आमदार विजयकुमार देशमुख यांच्या विरोधात २००९ आणि २०२४ अशा दोन वेळा आव्हान उभे केले होते. अशा प्रकारे सतत चार वेळा विधानसभा लढूनही त्यांचे आमदारकीचे स्वप्न साकार झाले नाही. नुकत्याच विधानसभा निवडणुकीत महेश कोठे हे सोलापूर शहर उत्तर मतदारसंघात राष्ट्रवादी काँग्रेस शरद पवार पक्षातर्फे उभे राहिले होते. परंतु, त्यांच्या पदरी अपयश आले. सध्या, महेश कोठे हे पराभवाच्या पार्श्वभूमीमुळे पक्षीय राजकारणात सक्रिय नव्हते.
हे ही वाचा:
Walmik Karad यांच्यावर मकोका कायदा दाखल; १४ दिवसांची न्यायालयीन कोठडी
