मस्साजोग गावाचे सरपंच संतोष देशमुख यांच्या हत्येप्रकरणी आज अखेरीस वाल्मिक कराड यांच्यावर मकोका कायदा दाखल. याअंतर्गत त्यांना १४ दिवसांची न्यायालयीन कोठडी सुनावण्यात आली आहे. दरम्यान, आज परळी पोलीस ठाण्याबाहेर वाल्मिक कराड यांची आई पारुबाई कराड यांनी ठिय्या आंदोलन केले होते. यावेळी त्यांची तब्येत खालावल्याचे समोर आले आहे.
बीड जिल्ह्यातील केज तालुक्यातील मस्साजोग येथील सरपंच संतोष देशमुख यांच्या हत्येप्रकरणात मोठी बातमी समोर येत आहे. वाल्मिक कराड याच्यावर मकोका लावण्यात आला आहे. सरपंच संतोष देशमुख यांच्या क्रूर हत्येला महिना झाला. तरी अद्याप मुख्य आरोपी कोण हे समोर आलेलं नाही. अशातच या हत्येचा मास्टरमाईंड म्हणून वाल्मिक कराड याचं नाव घेतलं जात आहे. संतोष देशमुख यांच्या हत्येप्रकरणात ८ आरोपींवर मकोका लावण्यात आला होता. मात्र वाल्मिक कराडची यातून सुटका झाली होती. त्यामुळे मस्साजोगचे ग्रामस्थ चांगलेच आक्रमक झाले होते. काल सरपंच संतोष देशमुख यांचा भाऊ धनंजय देशमुख यांनी पाण्याच्या टाकीवर चढून आंदोलन केलं होतं. यावेळी त्यांनी वाल्मिक कराडवर मकोका लावा आणि संतोष देशमुख यांना न्याय मिळाऊन द्या. अन्यथा आत्मदहन करू असा निर्वाणीचा इशारा यावेळी देण्यात आला होता. यासाठी मस्साजोगचे ग्रामस्थ आक्रमक होत विविध ठिकाणी मोर्चे देखील काढण्यात आले होते. अखेर आज वाल्मिक कराड याच्यावर मकोका लावण्यात आला आहे. तर वाल्मिक कराडवर मकोका लावण्यात आल्यानंतर सीआडीकडून कोर्टात अर्ज करण्यात आला आहे.त्यानंतर आज त्याच्यावर १४ दिवसाची न्यायालयीन कोठडी देण्यात आली. परंतु वाल्मिक कराडवर हत्याच्या गुन्हाखाली आमच्या ताब्यात द्या, अशी मागणी सीआडीकडून कोर्टाला केली आहे. यासाठी त्यांनी अर्ज देखील केला आहे. त्यानंतर सीआडीकडून वाल्मिक कराडला मकोका कोर्टात देखील नेण्यात आले आहे. त्यामुळे वाल्मिक कराडचा पाय आणखी खोलात गेल्याचे चित्र सध्या दिसून येत आहे.
दरम्यान, खंडणी प्रकरणातील आरोपी वाल्मिक कराड याच्या वयोवृद्ध आईने परळी शहर पोलीस ठाण्याबाहेर ठिय्या आंदोलन सुरू केले आहे. पारुबाई बाबुराव कराड असे त्यांचे नाव असून सकाळपासून त्यांनी ठिय्या आंदोलनाला सुरुवात केली आहे. एकीकडे आज वाल्मिक करडाची सीआयडी कोठडी संपणार असून त्याला केज न्यायालयात हजर करण्यात आले आहे. अशातच कराडच्या आईने हे आंदोलन सुरू केले आहे. माझ्या मुलाला जोपर्यंत न्याय मिळत नाही, त्याला सोडलं जात नाही तोपर्यंत इथेच ठिय्या आंदोलन करणार असल्याची प्रतिक्रिया वाल्मिक कराडची आई पारुबाई कराड यांनी दिली आहे. यावेळी त्यांची तब्येत खालावली असल्याचे देखील समोर आले आहे.