spot_img
Saturday, February 8, 2025

Latest Posts

राखेची वाहतूक करणाऱ्या टिप्परने धडक दिल्याने परळीमध्ये सरपंचाचा अपघातात बळी, आ. सुरेश धसांचा गंभीर आरोप

बीड येथील मस्साजोग गावाचे सरपंच संतोष देशमुख यांची अपहरण करून हत्या करण्यात आली. हा हत्याप्रकारण राज्यभरात चांगलेच चर्चेत आले आहे. त्यातच आता परळी तालुक्यात एक धक्कादायक घटना घडली. मिरवट फाट्यावर राखेची वाहतूक करणाऱ्या टिप्परने दुचाकीला जोरदार धडक दिल्याने विद्यमान सरपंच अभिमन्यू क्षीरसागर यांचा जागीच मृत्यू झाला. हा अपघात आहे की घातपात आहे? याबाबत पोलिसांकडून तपास सुरु आहे. आता याबाबत भाजपचे आमदार सुरेश धस यांनी गंभीर आरोप केलाय.

 

काय म्हणाले सुरेश धस
सुरेश धस म्हणाले की, काल रात्री नऊ वाजून वीस मिनिटांनी ही घटना घडली आहे. बोगस आणि अवैध राखेची लूट परळी भागात चालू आहे, याचा करिश्मा बघा. रात्री झालेली घटना घातपात की अपघात याचा शोध अजून लागायचा आहे. परळी विभागाची चर्चा महाराष्ट्रात सुरू असून सुद्धा राखेचे टीप्पर बंद नाहीत. या अवैध व्यवसायांना परळीचे पोलीस आणि थर्मल पॉवरचे अधिकारी आणि कर्मचारी जबाबदार असल्याचा आरोप त्यांनी केलाय.

काय आहे प्रकरण?
परळी तालुक्यातील मिरवड फाट्यावर शनिवारी रात्री एक भीषण अपघात झाला. सौंदाणा गावचे सरपंच अभिमन्यू क्षीरसागर यांच्या दुचाकीला राखेची वाहतूक करणाऱ्या टिप्परने उडवले. त्यात अभिमन्यू क्षीरसागर यांचा जागीच मृत्यू झाला. हा अपघात इतका भीषण होता की, त्यात सरपंचाच्या दुचाकीचा अक्षरशः चेंदामेंदा झाला आहे. अभिमन्यू क्षीरसागर हे रात्री त्यांच्या शेतातून घरी परतत होते. त्यावेळी राखेची वाहतूक करणाऱ्या टिप्परने जोरदार धडक दिली. अपघातानंतर टिप्पर चालक फरार झाला. हा अपघात आहे की घातपात याचा आता पोलीस तपास करत आहेत.

आकावरही मोक्का लागावा
संतोष देशमुख हत्या प्रकरणात वाल्मिक कराड सोडून सर्व आरोपींवर मोक्का लावण्यात आला आहे. यावरून शिवसेना ठाकरे गटाचे खासदार संजय राऊत यांनी जोरदार हल्लाबोल केला. मुख्यमंत्री देवेंद्र फडणवीस हे वारंवार वक्तव्य करत आहे की, कोणालाही सोडणार नाही. पण मुख्य आरोपीला त्यांनी सोडलं आहे. मुख्य आरोपीला सोडून सगळ्यांना त्यांनी मोक्का लावला आहे, असे त्यांनी म्हटले. याबाबत विचारले असता सुरेश धस म्हणाले की, अजून त्यांना इकडच्या गुन्ह्यात ट्रान्स्फर केलं नाही. सातही जणांवर मोक्का लागलाय. आमच्या अपेक्षा आका सुद्धा त्यामध्ये यावा आणि त्याच्यावर मोक्का लागावा, असे सुरेश धस यांनी यावेळी सांगितले.

Latest Posts

Don't Miss