Beed Crime : बीड जिल्ह्याच्या केज तालुक्यातील मस्साजोगचे सरपंच संतोष देशमुख यांच्या निर्घृण हत्येच्या (Santosh Deshmukh Death Case) घटनेनंतर बीडचे नाव हे केवळ राज्यात नव्हे तर देशाभरात गाजलं. सरपंच देशमुख यांच्या निर्घृण आणि अमानुष हत्येचे फोटो पाहून राज्यांमध्ये एकच उद्रेक झाला होता. या उद्रेकानंतर धनंजय मुंडे (Dhananjay Munde) यांचा राजीनामा गेल्या दोन महिन्यापासून जो चर्चेत होता, तो सुद्धा झाला. या सर्व घटनानंतर आता बीड जिल्ह्यातून एका-पाठोपाठ एका प्रकरणं बाहेर येऊ लागले आहे.
गेल्या काही दिवसांपासून बीड जिल्ह्यात सराईत गुन्हेगारीच्या अनेक घटना उघडकीस येत असल्याचे पाहायला मिळत आहे. अशातच बीडमधून मारहाणीचा आणखी एक नवा व्हिडीओ सध्या सोशल मीडियावर व्हायरल होत आहे. बीडचे राष्ट्रवादी काँग्रेस शरद पवार गटाचे आमदार संदीप क्षीरसागर यांच्या कार्यकर्त्यांकडून शोरूमच्या मॅनेजरला मारहाण करण्यात आली असल्याचा आरोप केला जात आहे. दरम्यान, शोरूमच्या मॅनेजरला मारहाण करणारे माझे कार्यकर्ते नव्हते, असं व्हायरल होणाऱ्या व्हिडीओवर संदीप क्षीरसागर यांनी स्पष्टीकरण दिलं आहे. मारहाण करण्यात येत असलेल्या मॅनेजरला वाचवणारे माझे कार्यकर्ते असून हा व्हिडीओ तीन महिने जुना असल्याचा संदीप क्षीरसागर यांनी दावा केला आहे. ‘तुम्ही व्हिडीओ बघा…माझा माणूस शोरूमच्या मॅनेजरला मारहाण करणाऱ्यांपासून वाचवतोय.. ज्या मॅनेजरला मारहाण झाली त्याने तेव्हाच तक्रार करायला हवी होती. या मारहाणीवर त्या शोरूम मॅनेजरची प्रतिक्रिया घ्यायला हवी होती. माझा माणूस जरी असला तरी त्याच्यावर कारवाई व्हायला हवी होती’, असं संदीप क्षीरसागर म्हणाले. ते पुढे असेही म्हणाले, शोरूम मॅनेजरने तक्रार केली असे माझ्या कानावर तरी आले नाही. सकाळपासून माहिती घेतोय त्यांच्यापैकी कोणीही कारवाई केली नाही. तुम्ही ते फुटेज बघा.. शोरूम मॅनेजरला मारहाण करणाऱ्यांची तुम्ही नावं घेताय.. ते वाचवताय की मारहाण करताय हे तुमच्या लक्षात येईल, असं स्पष्टपणे संदीप क्षीरसागर यांनी म्हटलंय.
पुढे आलेल्या माहितीनुसार, १२ डिसेंबर २०२४ चा हा व्हिडिओ असल्याचे सांगितले जात आहे. यात जयमल्हार बागल यांनी ही मारहाण केल्याचं ही बोलले जात आहे. अशातच काही दिवसांपूर्वी भाजप आमदार सुरेश धस (Suresh Dhas) यांनी धनंजय मुंडेंच्या आशीर्वादाने कृषी खात्यात २०० कोटींचा घोटाळा झाल्याचा आरोप केला होता. आता सुरेश धस कृषी विभागातील घोटाळ्याची थेट ईडीकडे तक्रार करणार असल्याचे बोललं जात असताना. सुरेश धस (Suresh Dhas) यांच्याशी जवळीक असलेल्या सतीश भोसले (Satish Bhosale) उर्फ खोक्या भाईचे प्रकरण बाहेर आलं असून त्याचे अनेक नवनवीन कारनामे पुढे आले आहे.
त्या पाठोपाठ धनंजय मुंडे यांच्यावर टीकेची झोड उठवणाऱ्या बीडचे राष्ट्रवादी काँग्रेस शरद पवार गटाचे आमदार संदीप क्षीरसागर यांच्या पीएचा व्हिडिओ पुढे आला आहे. मात्र १२ डिसेंबर २०२४ चा हा कथित व्हिडिओ आताच नेमका कसा व्हायरल झाला? यावरून अनेक शंका उपस्थित केल्या जात आहे. परिणामी या प्रकरणी आता नेमकी काय कारवाई होते आणि नवी कोणती माहिती पुढे येते का, हे पाहणे महत्वाचे ठरणार आहे. तर अचानक एकापाठोपाठ व्हायरल होणाऱ्या व्हिडिओस मागे कोणत्या राजकीय नेत्याचा तर हाथ नाही असा सवाल उपस्थित केला जात आहे.
हे ही वाचा :
Follow Us
