बीड जिल्ह्यातील मस्साजोग गावाचे सरपंच संतोष देशमुख हत्या प्रकरणात मंत्री धनंजय मुंडे यांचे निकटवर्तीय वाल्मिक कराड याला अटक करण्यात आली आहे. त्याच्यावर मकोका देखील लावण्यात आला आहे. त्याचसोबत कॅबिनेट मंत्री धंनजय मुंडे यांच्या राजीनाम्याची मागणी विरोधक आणि सत्ताधारी नेते करत आहे. मात्र, आता पहिल्यांदाच एका मंत्रायने धनंजय मुंडेंनी राजीनामा द्यायला हवा असं मोठं विधान केलं आहे. या विधानामुळे राजकीय वर्तुळात पुन्हा एकदा खळबळ माजली आहे. शिवसेनेचे परिवहन मंत्री प्रताप सरनाईक यांनी धनंजय मुंडेंनी नैतिकतेच्या आधारावर राजीनामा द्यायला हवा होता असं विधान केलं आहे.
नेमकं काय म्हणाले प्रताप सरनाईक
मी सुद्धा मंत्री आहे आणि एका जिल्ह्याचा पालकमंत्री आहे. शेवटी जबाबदारी तुम्ही मुख्यमंत्र्यांवर टाकून चालणार नाही ना. तुम्ही पालकमंत्री आहात. पालकमंत्री हा सर्वस्वी असतो जिल्हाचा. तुम्हाला जर एखादी वस्तू विकत घ्यायची असेल, निविदा प्रक्रिया करायची असेल तर त्यासाठी मुख्यमंत्र्यांची अनुमती घ्यायची गरज नाही. शेवटी पालकमंत्री म्हणून ही जबाबदारी तुमचीच आहे. त्यामुळे याच्या-त्याच्यावर ढकलून चालणार नाही.
पण एक गोष्ट तेवढीच खरी आहे की, सार्वभौम हा मुख्यमंत्री असतो. पण मुख्यमंत्री बघायला येत नाही की, प्रत्येक जिल्ह्याचा पालकमंत्री काय-काय किंमतीमध्ये आणि काय-काय दरामध्ये कुठल्या-कुठल्या गोष्टी घेतो. ठीकए.. अंजली दमानियांनी काही आरोप केले असतील तर त्या आरोपांना उत्तर द्यायला धनंजय मुंडेसुद्धा सक्षम आहेत आणि शिंदे साहेब सुद्धा सक्षम आहेत. परंतु आरोपांची शाहनिशा होणं देखील गरजेचं आहे.
नैतिकता आणि लोकाग्रहास्तव या दोन वेगवेगळ्या भूमिका आहेत. नैतिकतेला धरून राजीनामा देणं हे 100 टक्के तेवढंच खरं आहे. द्यायला हवा राजीनामा.. माझ्यावर देखील असे काही आरोप झाले तर मी दुसऱ्या सेकंदाला राजीनामा देईन. पण लोकाग्रहास्तव जर राजीनामा देण्याची कोणाची भूमिका असेल.. जर की, मोर्चे निघाले, आंदोलनं झाली किंवा आरोप झाले.. कुठलेही पुरावे नसताना तर तो राजीनामा देणं योग्य नाही असं मला वाटतं. पण नैतिकतेवर राजीनामा देणं ही महाराष्ट्राची संस्कृती आहे. महाराष्ट्राची परंपरा आहे. तो मंत्री असू द्या किंवा मुख्यमंत्री असू द्या. त्याने राजीनामा द्यायलाच हवा.
माझं असं मत आहे की, धनंजय मुंडे यांच्याविरोधात संभाषणं, चित्रफित किंवा पुरावे हे या केसमध्ये कोणीही सिद्ध करावं. आणि हे सिद्ध केल्यानंतर जर राजीनामा नाही दिला तर ती गोष्ट वेगळी आहे.
हे ही वाचा :
CIDCO च्या २६००० घरांच्या अर्जदारांची यादी ३ फेब्रुवारीला होणार प्रकाशित; सोडत कधी होणार जाहीर?