संपूर्ण महाराष्ट्रात विधानसभा निवडणुका २० नोव्हेंबरला पार पडल्या तर २३ नोव्हेंबरला निवडणुकांचा निकाल जाहीर झाला. महाराष्ट्रातील विधानसभा निवडणुकीचा निकाल लागून १२ दिवस उलटून अखेर आज ५ डिसेंबरला तो सुवर्णक्षण आलाच, ज्याची संपूर्ण राज्याची जनता आतुरतेने वाट पाहत होती. महाराष्ट्राचा मुख्यमंत्री कोण होणार या चर्चांना उधाण आले असतानाच काल ४ डिसेंबरला भाजपच्या बैठकीत झालेल्या निर्णयात विधिमंडळाच्या गटनेतेपदी देवेंद्र फडणवीस यांची निवड करण्यात आली आणि अखेर सर्वांची प्रतीक्षा संपली. महाराष्ट्रात पुन्हा एकदा देवेंद्र फडणवीस मुख्यमंत्री पदाची शपथ घेत आहेत. आज ५ डिसेंबर रोजी मुंबईतील आझाद मैदानावर मुख्यमंत्री आणि उपमुख्यमंत्रीपदाच्या शपथविधी सोहळ्यासाठी पंतप्रधान नरेंद्र मोदी, केंद्रीय गृहमंत्री अमित शाह, भाजपचे पक्षाध्यक्ष जे. पी. नड्डा तसेच अनेक राज्यांचे मुख्यमंत्री देखील या शपथविधी सोहळ्यासाठी उपस्थित आहेत.
अखेर देवेंद्र फडणवीस यांनी सर्व दिग्गजांच्या उपस्थितीत मुख्यमंत्रीपदाची शपथ घेतली. ते म्हणाले, “मी देवेंद्र सरिता गंगाधरराव फडणवीस ईश्वरसाक्ष शपथ घेतो की, कायद्याद्वारे स्थापित झाले आहे अशा भारताच्या संविधानाबद्दल मी खरी श्रद्धा व निष्ठा बाळगीन. मी भारताची सार्वभौमता व एकात्मता उन्नत राखीन. मी महाराष्ट्र राज्याचा मुख्यमंत्री म्हणून माझी कामे निष्ठापूर्वक व सदसत् विवेक बुद्धीने पार पाडेन, आणि संविधान व कायदा यानुसार सर्व तऱ्हेच्या लोकांना मी निर्भयपणे आणि निःपक्षपातीपणे तसेच कोणाच्याही विषयी नमत्वभाव व आकस ना बाळगता न्यायवागणूक देईन.”
“मी देवेंद्र सरिता गंगाधरराव फडणवीस ईश्वरसाक्ष शपथ घेतो की, महाराष्ट्र राज्याचा मुख्यमंत्री म्हणून माझ्या विचारार्थ आणली जाईल किंवा मला ज्ञात होईल अशी कोणतीही बाब असा मुख्यमंत्री म्हणून माझी कामे यथायोग्य पार पाडण्यासाठी आवश्यक असेल ते खेरीज करून एरव्ही मी कोणत्याही व्यक्तीला किंवा व्यक्तींना प्रत्यक्षपणे वा अप्रत्यक्षपणे कळवणार नाही किंवा त्यांच्याकडे उघड करणार नाही.”
महाराष्ट्राचे मुख्यमंत्री देवेंद्र फडणवीस यांच्यासोबत उपमुख्यमंत्री एकनाथ शिंदे आणि उपमुख्यमंत्री अजित पवार यांनीही आपल्या पदाचा शपथविधी सर्व मान्यवरांच्या उपस्थितीत पार पडला.
हे ही वाचा:
११ डिसेंबरला आमदारांचा होणार शपथविधी; कुणाच्या वाट्याला कोणते मंत्रिपद?
