New Delhi : देशाची राजधानी म्हणून ओळखल्या जाणाऱ्या नवी दिल्लीत एनसीआर परिसरात आज पहाटे म्हणजे १७ फेब्रुवारी २०२५ रोजी भूकंपाचे हादरे जाणवले आहेत. सोमवारी पहाटे ५ वाजून ३६ मिनिटांच्या सुमारास नवी दिल्लीत हे हादरे जाणवले. या भूकंपाची तीव्रता ४.३ रिक्टर स्केल इतकी नोंदवण्यात आली असून दिल्लीकरांमध्ये भीतीचे सावंत पसरले आहे. अनेकजण झोपेतूनचं खडबडून जागे झाले आहेत.
दिल्लीत अचानक झालेल्या या भूकंपामुळे लोकांमध्ये भीतीचे वातावरण पसरले आहे. पहाटे साखरझोपेत असताना अचानक जमीन हलत असल्याचे जाणवण्यास सुरुवात झाली. यानंतर दिल्लीकरांनी खबरदारी म्हणून तात्काळ घराबाहेर पडण्यास सुरुवात केली.नवी दिल्लीत एनसीआर परिसरात या भूकंपाचे धक्के जाणवले. या भूकंपाचे हादरे सकाळी ५:३६ जाणवले असून याचे केंद्र दिल्लीच्या जवळच जमिनीपासून ५ किलोमीटर खोलीवर होते. हा भूकंप दिल्ली-एनसीआरमध्ये २८.५९ उत्तर अक्षांश, ७७.१६ पूर्व रेखांश, ५ किमी खोलीवर झाला. यानंतर दिल्लीकरांनी खबरदारी म्हणून तात्काळ घराबाहेर पडण्यास सुरुवात केली. सुदैवाने या भूकंपामुळे कुठेही जीवितहानी किंवा वित्तहानी झालेली नाही.
