उपमुख्यमंत्री देवेंद्र फडणवीस आणि मनसे अध्यक्ष राज ठाकरे यांची भेट
1 या 7
उपमुख्यमंत्री देवेंद्र फडणवीस यांनी शुक्रवारी मनसे अध्यक्ष राज ठाकरे यांची 'शिवतीर्थ' या निवासस्थानी भेट घेतली.
मुंबईत आज सकाळी अकराच्या सुमारास देवेंद्र फडणीस यांनी राज ठाकरे यांच्या शिवतीर्थ या निवासस्थानी भेट घेतली.
देवेंद्र फडणवीस आणि राज ठाकरेंच्या या भेटीच्या पार्श्वभूमीवर विविध राजकीय चर्चांना उधाण आलं होतं. देवेंद्र फडणवीस आणि राज ठाकरे यांची दोन दिवसांपूर्वीच भेट होणार होती. पण पावसामुळे ही भेट रद्द करण्यात आली होती.
देवेंद्र फडणवीस हे उपमुख्यमंत्री पदी विराजमान झाल्याबद्दल त्यांना शुभेच्छा देत शर्मिला ठाकरे यांनी देवेंद्र फडणवीस यांचे औक्षण केले.
राज्यात नवीन सरकार सत्तेत आले; त्यावेळी राज ठाकरेंवर शस्त्रक्रिया झाली. त्यामुळे राज ठाकरे यांनी पत्राद्वारे फडणवीस यांना शुभेच्छा दिल्या. पत्राचं उत्तर देताना फडणवीस म्हणाले, तुम्ही दिलेल्या शुभेच्छांना स्वीकारून आम्ही स्वतः तुमच्या भेटीला येणार आहोत. शुक्रवारी फडणवीसांनी राज ठाकरे यांची प्रत्यक्ष भेट घेतली. शिवतीर्थावरील भेटीत नेमकी काय चर्चा झाली, याबाबत अनेक तर्क बांधले जात आहेत. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी शपथविधी घेतल्यानंतर आता संपूर्ण राज्याला मंत्रिमंडळ विस्ताराची अपेक्षा आहे.
मंत्रिमंडळ विस्तारापूर्वी फडणवीस यांनी मनसे अध्यक्ष राज ठाकरे यांची भेट घेतली. मनेसेचे एकमेव आमदार राजू पाटील यांना भाजपच्या कोट्यातून मंत्रिपद मिळण्याची शक्यता गेल्या काही दिवसांपासून वर्तवण्यात येत आहे.
देवेंद्र फडणवीस आणि मनसे अध्यक्ष राज ठाकरे यांच्या भेटीत नेमकं काय बोलणे झालं, हे मात्र स्पष्ट झाले नाही. देवेंद्र फडणवीस आणि राज ठाकरे भेटीचं नेमकं गुपीत काय? असा प्रश्न आता उपस्थित केला जातोय.
