New Parliament Building Inauguration, PM मोदींनी केले नवीन संसद भवनाचे उद्घाटन, जाणून घ्या सविस्तर माहिती

आज दिनांक २८ मे २०२३ (रविवार) रोजी भारताचे पंतप्रधान नरेंद्र मोदी हे दिल्लीतील नवीन संसद भवनाचे उद्घाटन करत आहेत. सकाळी ७.३० वाजल्यापासून संसद भवनाच्या पूजेने या सोहळ्याला सुरुवात झाली. या उद्घाटन सोहळ्याला देशभरातील ज्येष्ठ मंत्री, २५ राजकीय पक्षांचे सदस्य आणि धार्मिक नेत्यांसह अनेक मान्यवर या कार्यक्रमाला उपस्थित आहेत. तर काँग्रेससह २१ राजकीय पक्षांनी या कार्यक्रमावर बहिष्कार टाकला आहे. तर अनेक विरोधी पक्षांच्या बहिष्काराच्या दरम्यान पंतप्रधान मोदी अत्याधुनिक सुविधांनी सुसज्ज नवीन संसद भवन राष्ट्राला समर्पित करतील.

नवीन संसदेत, तामिळनाडूचा ऐतिहासिक राजदंड (सेंगोल) लोकसभेच्या अध्यक्षांच्या आसनाजवळ स्थापित केला जाईल. सत्ता हस्तांतरणाचे प्रतीक म्हणून ऑगस्ट १९४७ मध्ये पहिले पंतप्रधान जवाहरलाल नेहरू यांना दिलेला हा राजदंड अलाहाबाद संग्रहालयाच्या नेहरू गॅलरीत ठेवण्यात आला होता. नवीन संसद भवनाच्या उद्घाटनानिमित्त सरकार ७५ रुपयांचे स्मरणार्थी नाणेही जारी करणार आहे.

त्रिकोणी आकाराच्या चार मजली संसद भवनाचे अंगभूत क्षेत्र ६४,५०० चौरस मीटर आहे. नवीन संसदेत लोकसभेतील ८८८ आणि राज्यसभेतील ३८४ सदस्यांसाठी आसनव्यवस्था करण्यात आली आहे. तर संयुक्त अधिवेशनासाठी लोकसभेच्या सभागृहात १,२७२ सदस्य बसू शकतात. संसदेची विद्यमान इमारत ९६ वर्षे जुनी आहे, तिचे बांधकाम १९२७ मध्ये पूर्ण झाले. उद्घाटनापूर्वी लुटियन्स दिल्लीत सुरक्षा व्यवस्था वाढवण्यात आली आहे.

कार्यक्रमाचे वेळापत्रक

पंतप्रधान नरेंद्र मोदी सकाळी ७.१५ वाजता विजय चौकात पोहचले.
महात्मा गांधी यांच्या पुतळ्याजवळ बांधलेल्या पंडालमध्ये सकाळी ७.३० वाजता पूजा पार
सकाळी ८.३० वाजता पूजा समाप्त होणार आहे.
सकाळी ८.३० नंतर पंतप्रधान इतर मान्यवरांसह चेंबरला भेट देणार आहेत.
सकाळी ९ ते ९.३० या वेळेत प्रार्थना सभा होणार आहे.
सकाळी ९.३० नंतर पंतप्रधान प्रार्थना सभेसाठी रवाना होतील.
पाहुण्यांचे आगमन सकाळी ११.३० वाजता सुरू होणार आहे.
दुपारी १२.०० वाजता पंतप्रधान मान्यवरांसह मंचावर पोहोचणार आहेत.
दुपारी १२.०७ वाजता राष्ट्रगीत होणार आहे.
दुपारी १२.१० वाजता उपराष्ट्रपतींचे भाषण होणार आहे
दुपारी १२.३३ वाजता राष्ट्रपती द्रौपदी मुर्मू यांनी देशासाठी दिलेला संदेश वाचला जाणार आहे.
दुपारी १२.३८ वाजता विरोधी पक्षनेते राज्यसभेला संबोधित करणार आहेत.
दुपारी १२.४३ वाजता स्पीकर जनतेला संबोधित करतील.
पंतप्रधान मोदी दुपारी १.०५ वाजता ७५ रुपयांचे नाणे जारी करतील.
पंतप्रधान मोदींचे भाषण दुपारी १.१० वाजता सुरू होणार आहे.